Nemendur skila ekki hefðbundnu lokaverkefni við lok námsins.
Þess í stað sitja þau áfangann Nýsköpun og viðskiptaþróun, þar sem unnið er að raunhæfu og hagnýtu verkefni. Verkefnið felst í þróun viðskiptahugmyndar, gerð viðskiptalíkans, viðskiptaáætlunar og framkvæmdaáætlunar fyrir hugmyndina. Kennsla fer fram samhliða verkefnavinnunni, þar sem fræðileg umfjöllun og verkleg nálgun eru samþætt.
Í námskeiðinu er fjallað um stjórnun nýsköpunar- og viðskiptaþróunarverkefna, með sérstakri áherslu á frumkvöðla og athafnafólk. Í upphafi er farið yfir þörfina fyrir nýsköpun, hlutverk frumkvöðulsins, ferli þróunarstarfsins, og mismunandi tegundir nýsköpunar.
Þá er fjallað um greiningu viðskiptatækifæra, þróun vöru- eða þjónustuframboðs og mat á raunverulegri eftirspurn eftir lausninni. Á grundvelli þeirrar greiningar móta nemendur heppilegasta viðskiptalíkanið til að koma lausninni á markað.
Vinna við lokaverkefni hefst strax í lotu 6 á haustmisseri og vinna nemendur að verkefninu fram að lokum vormisseris.
