MBA nemar frá Háskóla Íslands með kynningu í höfuðstöðvum Starbucks | MBA-nám í Háskóla Íslands

MBA nemar frá Háskóla Íslands með kynningu í höfuðstöðvum Starbucks

MBA-nemar frá Háskóla Íslands kynntu hugmyndir sínar um útfærslu á ákveðnum rekstrarlegum þáttum fyrir yfirstjórn bandaríska veitingarisans Starbucks í Seattle í Bandaríkjunum. Fyrir helgina óskaði Starbucks eftir nánari kynningu nemenda Háskólans á hugmyndum þeirra um útfærslu á ákveðnu rekstrarfyrirkomulagi hjá kaffihúsakeðjunni heimsþekktu. Héldu nokkrir þeirra strax til Seattle og var kynningin þriðjudaginn 6. desember í stjórnarherbergi Starbucks.

Viðstaddir frá Starbucks voru Tara Haistings, Peter Filopovic og Chuck Little, sem öll eru háttsett í viðskiptaþróun hjá fyrirtækinu, með ólíkar áherslur eftir heimsálfum.

MBA nemar á öðru ári við Háskóla Íslands hafa undanfarið unnið að verkefninu í námskeiðinu Alþjóðasamskipti undir leiðsögn Svölu Guðmundsóttur dósent. Tara Haistings kom sem gestakennari í námskeiðið en hún starfar sem Diversity Manager hjá Starbucks.

Eitt af markmiðum MBA-námsins er að byggja upp og viðhalda öflugum tengslum við atvinnulífið á alþjóðlegum grunni og vinna að nýjum raunhæfum verkefnum í rekstri fyrirtækja. Raundæmi (e. case study) um Starbucks eru mjög vinsæl í viðskiptaháskólum um heim allan enda er Starbucks í 48. sæti yfir bestu vörumerki heims að mati viðskiptatímaritsins Forbes. Það er því gríðarlega mikil viðurkenning fyrir Háskóla Íslands að MBA-nemendur við skólann fái tækifæri til að kynna eigið verkefni í höfuðstöðvum Starbucks. Raundæmi frá Harvard Business School eru mjög vinsæll efniviður í MBA-námi um allan heim en með þessu er ljóst að lausnir raundæma frá MBA í Háskóla Íslands eiga erindi inn í alþjóðlegt viðskiptaumhverfi.

Þú ert að nota: brimir.rhi.hi.is